Teksa banorët e Divjakës kanë dalë në protestë kundër vendosjes së një trau në Parkun Kombëtar të Divjakës, që do të lejojë vetëm kalimin me pagesë për në brendësi të parkut, kundër këtij vendimi të Ministrisë së Mjedisit ka dalë deputeti socialist, Erion Braçe.
Braçe në një lidhje telefonike në Report Tv ka deklaruar gjithashtu se zyrtarë të Ministrisë së Mjedisit kanë telefonuar zyrtarë të Bashkisë Divjakë dhe u kanë thënë se ‘do të fluturojnë’ nëse e pengojnë vendosjen e traut.
Sipas Braçes zyrtarë të bashkisë kanë qenë në të drejtën e tyre që të kërkonin që të kishte leje ndërtimi.
“Ka një kakofoni që bëhet për interesa politike. Banorët e bashkisë së Divjakës përjashtojnë nga pagesa e këtij detyrimi por kjo nuk ka rëndësi përderisa të tjerët ndalojnë të kalojnë lirshëm. Për më të tepër që po vendose në një vend që nuk garanton sigurinë rrugore. Kjo është e paligjshme. Unë do të ndërmarr çfarëdolloj nisme që ta rrëzoj këtë projekt. Zyrtarët e bashkisë së Divjakës janë telefonuar dhe kërcënuar se fluturojnë nëse e ndalojnë atë traun. Ata e kanë pezulluar përmes një vendimi atë kabinë atje, që është një kioskë. Zyrtarë të Ministrisë së Mjedisit kanë telefonuar zyrtarë të Divjakës dhe u kanë thënë se ‘do të fluturojnë’ nëse e pengojnë ndërkohë që ata kanë qenë në të drejtën e tyre që kërkonin që të kishte leje ndërtimi. Zyrtarët kanë shkuar pranë vendit ku po bëhej ky ndërtim pa leje. Janë telefonuar nga zyrtarë të Ministrisë së Mjedisit dhe janë kërcënuar”, tha ai.
