Kreu i PD-së Sali Berisha ka dalë në konferencë për gazetarët këtë të Hënë duke parashtruar një tjetër objektiv në rast se kjo forcë politike fiton zgjedhjet. Një ndër aktet e para pas inaugurimit të qeverisë së Partisë Demokratike, tha ai, do të jetë fiksimi i normës së Euros.
“Së pari qeveria do krijojë Bordin e Fiksimit të Euros. Nuk mundet që narko-Euro të shkatërrojë ekonominë shqiptare! Do fiksohet norma, do kompensojë eksportuesit për vlerën dhe gjithë humbjen që kanë nga rënia e Euros. Kompensimi do jetë nga niveli i Euros në treg me vlerën e Euros së fiksuar nga qeveria. Ne do zerojmë efektin toksik të narko-Eurove në ekonomi, të paktën tek eksportet”,-tha ai.
Së dyti, premtoi se do të ulen në mënyrë drastike të gjitha taksat për sipërmarrjet e eksportit.
“Do të heqim TVSH-në për energjinë, do lidhim marrëveshje me sipërmarrjen energjetikë për të blerë energji. Përndryshe, ekonomia eksportuese do vdesë. Do jemi një shtet që vetëm importojmë dhe qarkullojmë Eurot e baronëve të drogës“, theksoi kryedemokrati.
