Biznesmeni francez Francois-Henri Pinault, i cili është shefi ekzekutiv i Kering dhe zotëron markat si Gucci dhe Yves Saint Laurent premtoi 100 milionë euro për të ndihmuar në rindërtimin e katedrales së Notre Dame pasi një zjarr katastrofik shkatërroi kulmin e saj.
Pinault, i cili u martua me aktoren meksikane-amerikane Salma Hayek në 2009, e bëri njoftimin vetëm disa orë pas tragjedisë.
Ai foli pasi presidenti Emmanuel Macron deklaroi jashtë katedrales gotike se një fushatë kombëtare për mbledhjen e fondeve për të rivendosur Notre Dame do të fillojë të martën.
Kujtojmë se gjatë mbasdites së djeshme katedralja e Notre Dame në Paris u përfshi nga flakët, ndërsa vetëm gjatë orëve të para të mëngjesit të ditës së martë situata u vu nën kontroll.
Si pasojë e zjarrit, është shkatërruar dy e treta e tavanit dhe ka rënë kupola e katedrales. Prokuroria e Parisit ka nisur hetimet për zjarrin, ndërsa policia ka hedhur hipotezën se gjithçka nisi gjatë punimeve për restaurimin e kambanores./Opinion.al
