Pas lajmit se në zonën e Kamzës, digjen në mënyrë skandaloze pa asnjë masë sigurie mbetjet e ndryshme, duke vënë në rrezik jetën e qytetarëve që jetojnë aty, ka ardhur edhe reagimi i Bashkisë së Kamzës. Në reagimin e saj thuhet se në venddepozitimin e mbetjeve ka krijuar vështirësi shpërthimi i vatrave të zjarrit, por që Bashika po punon për normalizimin e situatës
‘’Ditët e nxehta të kësaj periudhe verore kanë krijuar problemet e vatrave të zjarreve edhe në Kamëz. Një situatë e tillë ka shpërthyer edhe në venddepozitimin e mbeturinave në territorin e Bashkisë Kamëz. Kjo situatë ka vështirësuar disi problematikën e transportit dhe zhvendosjes së mbetjeve urbane në qytet drejt venddepozitimit, pasi hedhja e tyre në këtë vend do të nxiste fenomenin e djegieve dhe do të krijonte një problematikë të jashtëzakonshme jo vetëm për qytetarët që janë në afërsi të kësaj pike, por për mbarë qytetarët e Kamzës.
Në këto kushte, Bashkia po monitoron dhe po ndjek situatën për të neutralizuar ndotjen si shkak i zjarrit të ndezur në këtë venddepozitim. Ndërkohë, po punohet dhe do të punohet 24 orë për të stabilizuar gjendjen dhe për të gjetur alternativat e duhura për transportimin e mbeturinave të qytetit. Shumë shpejt do të zgjidhim këtë problem, që nuk është vetëm në Kamëz, por në të gjithë territorin e Shqipërisë.
Organizimi i largimit të mbetjeve të qytetit ka filluar dhe së shpejti situata do të jetë normale, duke u ardhur në ndihmë qytetarëve të Kamzës, por edhe bizneseve që janë pranë venddepozitimit për të vazhduar një aktivitet normal, gjithmonë në kujdesin e mbrojtjes së mjedisit dhe kujdesit ndaj jetës së qytetarëve të Kamzës’’, thuhet ne reagimin e Bashkisë.
Kujtojmë që qytetarët të shumtë kanë denoncuar në Opinion.al se si po digjen mbetjet urbane fare pranë rrugës kryesore Kamëz-Fushë Krujë.
