Lulzim Basha mblodhi paraditen e së hënës Grupin Parlamentar për të diskutuar aktin ekstrem të djegies së mandateve. Në mbledhje nuk ishin aleatët historikë të PD, të cilët kanë marrë mandatet si deputetë të PD.
Opinion.al mëson se Basha ka deklaruar para deputeteve se “duhet të jenë me qytetarët, të cilët treguan edhe njëherësë kanë besim”. “Ne jemi në borxh me qytetarët. Ata na dhanë besimin, ne duhet të jemi me ta”, mësohet të ketë thënë Basha.
Por kjo lëvizje e kryedemokratit duket se nuk ka shqetësuar aspak kryeministrin Edi Rama. Ky i fundit nga mbledhja e grupit socialist ka thënë se opozita nuk do gjejë konsensus për djegien e mandateve. “Nuk besoj se do gjejnë konsensus për djegien e mandateve. Ne duhet të përmirësohemi. Mes shpifjeve të kundërshtarëve të shohim çfarë nuk shkon me ne“, mësohet të jetë shprehur Rama para deputetëve të tij.
Sipas Kodit Zgjedhor, në rastin e tërheqjes së deputetit, Kuvendi i Shqipërisë njofton KQZ-në për zëvendësimin e vakancës. Në nenin 71 të Kushtetutës përcaktohet se kur një deputet merr mandatin e deputetit dhe kur është i pavlefshëm. Në pikën B të këtij neni përcaktohet edhe dorëzimi me dëshirë i mandatit nga ana e deputetit.
