Kryeministri Edi Rama , në një konferencë për mediat ka folur në lidhje me rastin e djalit shqiptarë të bllokuar në një kamp sirian ku strehohen gra dhe fëmijë të personave të lidhur me ISIS.
Në fjalën e tij, Rama tha se kjo është një rast i komplikuar, duke theksuar se kjo nuk është çështje ambasadash.
Kryeministri tha po ashtu se ka komunikuar me babain e djalit, ku e ka informuar se kjo çështje nuk varet vetëm nga Shqipëria. Ai tha se qeveria ka një plan veprimi së bashku me partnerët e Shqipërisë që të mund të tërheqin djalin nga kampi ku ndodhet.
“Unë nuk e kam ndjekur, por më ka lënë të kuptohet se çështja e djalit të mitur është një çështje vullneti nga ana jonë apo e ambasadorit. Kjo është e pavërtetë. E vërteta është se prej disa kohësh unë kam nxjerr një urdhër, të cilin nuk mund ta ndaj për publikun, lidhur me personat që gjenden në atë territor si pasojë e përfshirjes së burrave në një luftë për të tjerë në funksion të organizatës terroriste të ISIS. Shqetësimi ynë ka qenë i lidhur me nevojën për të aksesuar në këto kampe ku ka edhe një numër grash dhe fëmijësh. Në bashkëpunim edhe me partnerët amerikanë, ne kemi zhvilluar një proces të tërë identifikimi. Disponojmë të dhëna mbi identitetin e shumë personave, por e përsëris, janë të dhëna shumë sensitive. Tërheqja e tyre nga ato kampe nuk bëhet as me ambasada dhe as me ambasadorë sepse i gjithë procesi është tejet i komplikuar. Kemi një plan të tërë veprimi të rakorduar me partnerët tanë kryesorë, ka një sërë grupesh të përfshira në këtë proces. Dua t’iu them të gjithëve se po të ishte një çështje ambasadash apo ambasadorësh edhe vende të tjera do të kishin tërhequr individët. Kam komunikuar edhe me babanë e djalit dhe i kam sqaruar se kjo çështje nuk varet nga ne”, tha Rama./Opinion.al E.Xh.
