Demokracia nuk është thjesht zëvendësim emrash në listë. Kështu është shprehur sot në Parlament ish-Ministri i Jashtëm Ditmir Bushati, i cili tha se mbështeste propozimet e Damian Gjiknurit për Kodin Zgjedhor dhe se marrëveshja duhet bërë me opozitën politike, pra me ata që janë jashtë Parlamentit.
“Nuk mund të na bëjë ne të jemi arrogantë, nuk mund të na bëjë ne të harxhojmë orë të tëra duke u marrë me protestat e opozitës. Ne nuk mund të biem në kurthin e profecisë vetpërmbushëse. Kjo është arsyeja që unë e mbështes propozimin e Damian Gjiknurit për t’i ofruar një hapsirë më të madhe të gjithë aktorëve politikë, sepse demokracinë nuk e konceptoj si procedurë të thjeshtë. Demokracia si procedurë është zëvëndësimi formal i listës së Partisë Demokratike dhe Lëvizjes Socialiste për Integrim. Por demokracia është edhe thelb dhe fakti që ne krijojmë mundësinë për një marrëveshje të ardhshme për Kodin Zgjedhor për rregullat e lojës, qoftë me opozitën parlamentare por mbi të gjitha për opozitën politike”, është shprehur ai.
Para tij, ishte Rudina Hajdari e cila kërkoi që Kodi Zgjedhor të negociohej me deputetët aktualë të Partisë Demokratike dhe jo me ata që kanë lënë mandatin.
Më pas, kryeministri Rama tha se opozita në Parlament dhe ata jashtë janë njësoj, pjesë e partive të njëjta dhe se lëshimi i vetëm që mund të bëjë për opozitën është bashkëpunimi për reformën zgjedhore./Opinion.al
