TIRANE- Sot kreu i Kuvendit Ilir Meta bën 47 vjeç. Dita e lindjes së tij përkon me seancën e së enjtes në parlament. I ulur në vendin e tij në drejtim të seancës ai është përballur me protestën e demokratëve që u bien tavolinave dhe kanë bllokuar foltoren. Edhe pse ka kaluar rreth një orë nga seanca plenare e ditës së sotme askush nuk e kishte uruar publikisht Ilir Metën.
Ka qenë deputeti Bujar Çela, njëherësh kryetar i PS-së në Lushnje, i cili ka folur nga salla dhe ka uruar Ilir Metën për ditëlindjen. Ai i kërkoi opozitës të uronte kryeparlamentarin sepse e kanë pasur në koalicion.
Salla e Kuvendit është përfshirë në ovacione në ato momente.
Më pas e ka marrë fjalën, deputetja e PS Arta Dade i cila i kujtoi deputetit të saj parafolës por edhe gjithë të tjerëve se sot është edhe ditëlindja e ministrit të Jashtëm, Ditmir Bushati dhe ka uruar Bushatin në emër të gjithë socialistëve./Opinion.al
