Dita e sotme, e enjte, 23 shkurt, është mbyllur me tre deklarata të forta në lidhje me Qeverinë dhe qeverisjen e vendit. Siç duket, kultivimi dhe trafikimi i drogës, bandat kriminale nga njëra anë, ndërsa nga tjetra kriza politike që ka pllakosur vendin, ka shqetësuar jo vetëm institucionet e vendeve fqinje por edhe trupin diplomatik në vend.
Deklarata e parë është e ambasadorit të OSBE në Tiranë Bernd Borchardt:
Ai tha se në Shqipëri ndodhen në qarkullim dy miliardë euro të përfituara nga droga, që pritet të paguhen për të blerë deputetët në zgjedhjet e ardhshme parlamentare. Zoti Bernd Borchardt e bëri këtë deklaratë pak javë pasi ambasadori i SHBA, Donald Lu tha se me këtë politikë të inkriminuar nuk mund të ketë zgjedhje të lira.
Deklarata e dytë është e Franco Robertit, kreu i Anti-Mafias Italiane:
Në një konferencë për mediat në krah të prokurorit të Përgjithshëm, Adriatik Llalla, zoti Roberti tha se ka shifra të çmendura për rritjen e prodhimit të drogës në Shqipëri; ajo është trefishuar.
Zoti Roberti dha alarmin e rritjes së trafikut të drogës nga Shqipëria drejt Italisë. Sipas tij, me interes për të dy vendet është jo vetëm lufta ndaj drogës, por edhe korrupsionit.
“Trafiku i drogës Shqipëri-Itali, në rritje. Interesi i përbashkët mes dy vendeve është të luftojnë jo vetëm drogën, por edhe korrupsionin. Duhet bashkëpunim mes dy vendeve për luftën ndaj krimit. Bisedime për të përmirësuar strategjitë. Shkëmbimi i informacioneve shumë efikas”, tha zoti Roberti.
Deklarata e tretë është bërë nga kreu i opozitës Lulzim Basha në emisionin Opinion, drejtpërsëdrejti nga “Çadra e Lirisë”, ku opozita shqiptare prej 5 ditësh është ngujuar përballë Kryeministrisë me arsyen e garantimit të zgjedhjeve të lira dhe të ndershme.
Basha deklaroi se faktologjia ka treguar se kjo qeveri nuk mund të realizojë zgjedhje të lira dhe të ndershme për tre arsye:
E para, inkriminimi i shtetit. Ky kryeministër ka sjellë banditët në zyrat e shtetit dhe në parlamentin shqiptar e bashkitë e vendit. Në institucionet më të rëndësishme, në vend që të kishim njerëz me integritet dhe përfaqësues të popullit, fatkeqësisht, kemi bandit të inkriminuar e të dënuar.
E dyta, kemi një gjeografi të bandave që janë bërë gati për t’i vërsulur votës së lirë. Nga jugu në veri dhe nga lindja në perëndim, qytet më qytet dhe fshat më fshat. Shikoni se çfarë ndodhi në Lezhë para dy ditësh, Arben Ndoka, i larguar gjoja në emër të dekriminalizimit ai sulmon Agustin Markun një ish eksponent të PS-së.
E treta, është droga. Dy miliard euro qarkullojnë para të pista nga kjo praktikë në Shqipëri, tha ambasadori i OSBE-së. Ndërsa vetëm BBC ka treguar se qarkullojnë 5 miliard euro nga droga në vendin tonë. Sot ka një kërcënim real nga droga, e cila është produkt e qeverisjes së inkriminuar.
Këtë e di çdo shqiptar që droga dhe krimi po shkatërrojnë Shqipërinë.
