Sot, më 28 nëntor Shqipëria feston ditën e flamurit dhe të pavarësisë. Në këtë ditë të rëndësishme për vendin, Presidenti Ilir Meta ka postuar urimin e tij në “Facebook”.
Meta shkruan se duhet “të punojmë dhe angazhohemi çdo ditë për ta mbrojtur simbolin tonë të shenjtë dhe përbashkues, të valvitet krenar në këto troje, i pastër dhe i paprekur, njësoj si gjaku i derdhur për të, nga bijat e bijtë më të mirë të kombit.”
Presidenti thekson se 108 vite pavarësi dëshmojnë pjekurinë dhe seriozitetin e një shteti modern, ndërsa thekson se duhet të përmbushim aspiratat e Shqipërisë për ta bërë si gjithë Europa
“Gëzuar Ditën e Flamurit Kombëtar, Ditën e Pavarësisë së Shqipërisë! Të punojmë dhe angazhohemi çdo ditë për ta mbrojtur simbolin tonë të shenjtë dhe përbashkues, të valvitet krenar në këto troje, i pastër dhe i paprekur, njësoj si gjaku i derdhur për të, nga bijat e bijtë më të mirë të kombit. 108 vite janë mjaftueshëm për të dëshmuar pjekurinë dhe seriozitetin e një shteti modern, për përmbushjen pa vonesë të aspiratës popullore dhe misionit të nisur në 28 nëntor 1912, nga Ismail Bej Vlora dhe gjithë etërit e Pavarësisë, për ta bërë Shqipërinë si gjithë Europa. Urime për 28 Nëntorin e Gjergj Kastrioti Skënderbeut, Ismail Qemalit dhe Isa Boletinit! Zoti e bekoftë Flamurin Kombëtar dhe shqiptarët kudo ndodhen!”-shkruan Meta.
Ndërkohë, kryeministri Edi Rama nuk i ka kushtuar një postim të gjatë për t’iu uruar ditën e pavarësisë shqiptarëve. Ai është mjaftuar me publikimin e një fotoje të Ismail Qemalit ku lexohet; “Flamuri ynë, n’atdhenë t’onë të lirë. Rroftë Flamuri!Rroftë Shqipërija!”/ Opinion.al
