Ashtu siç ishte paralajmëruar, kreu i Këshillit të Lartë të Prokurorisë, Gent Ibrahimi ka prezantuar sot në ditën e parë të punës të SPAK drejtuesin e parë të këtij institucioni.
Arben Kraja u zgjodh dje në krye të njësisë që do të hetojë korrupsionin dhe krimin e organizuar të niveleve të larta.
“Tani është koha për punë, jo për llafe, kemi shumë punë për të bërë.” Këto ishin fjalët e tij në ditën e parë të prezantimit si kryetar i Prokurorisë së Posaçme të SPAK.
Përpara anëtarëve të SPAK, Kraja u zotua se ky institucion do të ketë një skuadër të fortë, e cila do e drejtojë me kompetencë.
“Do të bëjmë një skuadër shumë të fortë që do ta drejtojë me plot kompetencë këtë institucion”, tha kryeprokurori i SPAK.
Edhe kreu i KLP theksoi se viti që vjen pritet të jetë intensiv sa i përket punës që do të kryehet.
“Prokurorët e SPAK fillojnë sot detyrën, zoti Kraja është në krye të detyrës dhe të gjithë mund të shkojmë të festojmë të qetë festat, me vetëdijen se fillim viti do të jetë intensiv. Intensiv për të gjithë ne në frontet përkatëse të punës”, theksoi kreu i KLP-së, Gent Ibrahimi. /Opinion.al
