Banorët e Astirit kanë rinisur protestën tek Unaza e Re duke bllokuar rrugën.
Protesta e banorëve ka hyrë sot në ditën e 24-të dhe që prej ditës së parë ata kundërshtojnë ndërtimin e Unazës së Madhe të Tiranës, pasi sipas tyre projekti prek banesat e tyre.
Mësohet se gjatë gjithë ditës ka qenë e bllokuar vetëm një kah i rrugës, ndërsa në orën 5 janë bllokuar të dyja.
Shiu nuk i ka ndalur banorët të dalin me karrige nga shtëpia dhe të ulen në mes të rrugës. Heqja e shtyllave të ndriçimit është hapi i parë për ndërtimin e projektit.
Banorët vazhdojnë me të njëjtat thirrje “Nuk na përçani dot”, “Jug, veri jemi një” e “do t’i mbrojmë shtëpitë me gjak”. Drejtuesit e automjeteve kanë fikur automjetet dhe nuk u bien burive.
Në mbështetje të banorëve kanë shkuar sërish deputetët e PD dhe aktivistë të shoqërisë civile.
