Gruaja që dinte më shumë se sa duhej. Kështu shkruajnë mediat italiane për Imane Fadil, modelen 33-vjeçare që ndërroi jetë në një spital të Milanos më 1 mars, një muaj pasi u shtrua me urgjencë pas dhimbjeve të forta në bark. Imane Fadil nga Maroku, merrte pjesë rregullisht në festat e ish-kryeministrit italian Silvio Berluskoni, të njohura si “bunga-bunga”, prandaj vdekja e saj po trajtohet si vrasje e qëllimshme.
Imane Fadil ka dëshmuar në vitin 2012 në gjyqin kundër Berluskonit, duke dhënë edhe detaje se si vajzat rekrutoheshin për të marrë pjesë në festat e kryeministrit italian. Ky i fundit, gjithmonë e ka mohuar se e ka njohur 33-vjeçaren.
Sipas mediave, Fadil ka shfaqur shenja që përputhen me ato të helmimit. Në fakt, më 29 janar Fadil ka kontaktuar menjëherë me avokatin e saj, duke i thënë “Më kanë helmuar, më ndihmo!”. Asnjë nuk i besoi, deri sa modelja filloi të ndihej keq dhe fillimisht u shtrua në terapi intensive e më pas në reaniamacion për rreth një muaj. Nga dëshmitë e mjekëve, rezulton se mund të jetë helmuar me një përzierje substancash radioaktive.
Imane Fadil po shkruante edhe një libër mbi eksperiencat e veta dhe lidhjet me politikanët. Prokurorët që po hetojnë vdekjen e saj, kanë marrë një kopje të dorëshkrimit./Opinon.al
