Artan Çuku, që ka mbajtur disa deyra në polici, më e larta ajo e drejtorit të policisë së Vlorës, është ekzekutuar mbrëmë me armë zjarri pak metra larg shtëpisë së tij në Tiranë. Nuk ka ende asnjë gjurmë nga autorët, ndërsa policia ka zbardhur dinamikën e ngjarjes. Dyshimet e para janë se vrasja mund të jetë për shkak të detyrës.
Ngjarja ndodhi rreth orës 20:00, pranë banesës së tij, në një pallat në Rrugën e Kosovarëve, gati 150 metra larg digës së Liqenit Artificial në Tiranë. 42 vjeçari është qëlluar në distancë të afërt dhe plagët e marra i kanë shkaktuar vdekje të menjëhershme. Dy persona i kishin zënë pritë teksa ai kthehej në shtëpi. Ata dyshohet se pas krimit u larguan me motorë nga vendi i ngjarjes duke shfrytëzuar rrugicat ndërmjet pallateve pa u vënë re.
Para ngjarjes, 42vjeçari ka qenë i ulur në një nga lokalet e zonës. Dyshimet e para në lidhje me motivin e ngjarjes janë ato të vrasjes për shkak të detyrës së tij si ishpunonjës policie.
Dinamika e ngjarjes lë të kuptohet se autorët i kanë studiuar lëvizjet e viktimës para ngjarjes dhe vendin ku do të kryenin goditjen. Ish-polici është përballur me ekzekutorët e tij pranë hyrjes së pallatit, pak para se të mbërrinte tek ashensori. Hyrja e pallatit ndodhet në anën e pasme të godinës referuar me Rrugën e Kosovarëve dhe ballë saj rrugica kufizohet me një avlli muri rreth 2030 metra. Të gjitha këto, shto edhe ndriçimin jo të plotë të rrugicës, për shkak se zona është në ndërtim, duket se kanë qenë në favor të autorëve.
Sipas burimeve, vetëm njëri prej tyre ka hapur zjarr drejt 42 vjeçarit. Plumbat i kanë shkaktuar plagë në organet jetësore dhe i kanë shkaktuar vdekje të menjëhershme, pa i dhënë mundësi transporti për në spital. Dyshohet se autorët janë larguar nga vendi i ngjarjes duke përdorur rrugicat që bashkojnë zonën me sheshin “Willson”. Me gjithë ngritjen e post-blloqeve të shumta policore në Tiranë ata nuk ishin identifikuar.
