U premtua se brenda datës 31 dhjetor të 2020, familjet e dëmtuara nga tërmeti do të hynin në banesa të reja. Megjithatë nga 1615 familje të mbetura të pastrehë në bashkinë e Kurbinit, asnjë prej tyre nuk ka kaluar festat e fundvitit në shtëpi të re.
Kryebashkiakja Majlinda Cara, thotë se 180 familje në Laç do të strehohen në apartamente të reja brenda muajit mars të Vitit të Ri.
“Deri tani ka përfunduar një objekt arsimor, ndërkohë që pritet të përfundojë shpejt objekti i shkollës i gjimnazit Arif Sula në Mamurras në proces është edhe rindërtimi i 8 institucioneve arsimore të tjera. Ka qenë një vit i vështirë, një vit me sfida të forta, por që tashmë jemi në hapat e duhura që të kthejmë banorët e Kurbinit në shtëpitë e reja” u shpreh Cara.
Cara deklaron se deri tani ka përfunduar vetëm një objekt arsimor.
“180 familje do të akomodohen në zonën 1/1 në muajin mars dhe në muajin gusht jam besimplotë që do të përfundojë i gjithë projekti i 522 apartamenteve”, u shpreh Majlinda Cara.
Por edhe pse banorët e kësaj zone presin shtëpitë e reja, ka ende ndërtesa që janë bërë gati për t’u shembur, pa pasur ende një datë të qartë.
Ka inerte që kanë zënë vend aty prej muajsh.
Ndërtimi i një lagjeje të re me 524 banesa, si financim i qeverisë turke, nga e cila pritet të përfitojnë gati 1/3 e 1615 familjeve që përfitojnë bonus qiraje, ka afat 360 ditë që nga tetori i 2020, kur dhe është marrë leja e ndërtimit.
Bashkia e Kurbinit është një nga zonat që u goditën më rëndë nga tërmeti i 26 nëntorit 2019./ Burimi” ABC News
