Grupi i hetimit i Prokurorisë së Shkodrës ka shkuar dje në Spitalin Ushtarak ku ndodhet Gerald Baramuça dhe ka kërkuar të marrë në pyetje të mbijetuarin nga rrëzimi i helikopterit të Ushtrisë në Shkodër.
Pas konsultimit edhe me stafin mjekësor, është vendosur që ai të pyetet gjerësisht në një moment tjetër, për shkak të gjendjes jo të mirë në të cilën ndodhet.
Në komunikimin prej pak minutash me hetuesit, ushtaraku ka thënë se gjatë misionit të fluturimit nuk ka pasur asnjë rast të motit të keq me re apo probleme të tjera gjatë gjithë itinerarit të fluturimit
Po ashtu, në lidhje me mosdhënien e sinjalit SOS nga mjeti fluturues EC 145, ai ka shpjeguar se personat në bord nuk kanë konstatuar në asnjë rast shenja defekti apo avarie në panelin e drejtimit në kabinë.
Baramuça ka bërë me dije se, mesa mban mend, helikopteri ka pësuar humbje të drejtimit dhe për këtë arsye ai ka hapur derën e pasme
dhe është hedhur duke parë se poshtë kishte ujë.
Ndërkaq, Prokuroria i ka kërkuar Ministrisë së Mbrojtjes realizimin e nxjerrjes së trupit të helikopterit nga thellësia prej 5 metrash në liqenin e Shkodrës, pasi kërkohet vinç me krah të gjatë për të bërë tërheqjen.
Qëllimi është këqyrja e dëmtimeve fizike të jashtme në trupin e helikopterit.
Po ashtu, është kërkuar asistencë teknike nga kontraktori prodhues i mjetit, me qëllim dekodimin e sistemit të helikopterit dhe leximin e kutisë së zezë.
Ndërkaq, vendi ku u rrëzua helikopteri i Forcave të Armatosura në liqenin e Shkodrës po ruhet nën masa të rrepta sigurie.
Forcat e Policisë kanë krijuar një perimetër prej 200300 metrash ku askush nuk lejohet që të afrohet. Edhe banorët e zonës që kanë kureshtje po mbahen larg vendit ku ra helikopteri.
Por, siç mësohet, pala shqiptare po pret përfaqësues të kompanisë “Eurocopter” për ta nxjerrë helikopterin, sepse janë ata që e kanë prodhuar dhe tashmë do të ofrojnë asistencën e tyre.
Në liqen gjatë gjithë kohës patrullon një skaf i madh i Policisë së Shtetit, duke pasur nën kontroll zonën.
Burime nga grupi hetimor që ka marrë këtë çështje, bënë të ditur edhe një fakt tjetër, i cili po hetohet tashmë, jastëkët e ajrit që nuk janë hapur.
Sipas tyre, në momentin e përplasjes duhet të ishin hapur ato, në mënyrë që helikopteri të dilte në sipërfaqe të ujit.
Gjithsesi, janë hetimet e mëtejshme të Prokurorisë Ushtarake do të zbardhin më shumë rreth shkaqeve.
Një banor i zonës mësohet se ka deklaruar se nga dritarja e tij ka parë helikopterin duke fluturuar dhe ka kuptuar se diçka nuk shkonte, sepse po fluturonte poshtë, derisa është përplasur në liqenin e Shkodrës./ Panorama.al
