Mijëra maturantë edhe këtë vit po përballen me një nga zgjedhjet më të rëndësishme, atë të degës së studimit për në universitet.
Ekspertët e punësimit sugjerojnë që të rinjtë të mbështeten tek pasionet e tyre, por pa lënë pas edhe karrierën që ofron një degë e caktuar.
“Duhet të ketë gjithmonë një alternim mes dëshirës personale dhe nevojës së tregut të punës… më shumë se çdo gjë duhet të bëjmë një punë që na pëlqen, por ajo punë duhet përshtatur edhe me kërkesat e tregut të punës”, thotë ekspertja e punësimi, Gertjana Hasalla.
“Maturanti duhet të shohë aftësitë që ka vetë, pra duhet të bëjë një vetëvlerësim dhe të shohë të vetja është një natyrë që është më e prirur nga njerëzit, komunikimi apo teknologjia, te dhënat, kujdesi ndaj të tjerëve… Duhet të shikojnë edhe karrierën që mund të ofrohet në këtë degë”, shton Erald Pashaj, një tjetër ekspert punësimi.
Dy sektorët e ekonomisë që kanë kërkesa për punonjës janë ndërtimi dhe shërbimet.
“Shqipëria sot ka nevojë për profesionistë bazë, elektricistë, hidraulikë, mekanikë, hidraulikë, staf shërbimi”, thotë Hasalla.
“Ka disa degë që sot janë shumë të kërkuara siç është kujdesi shëndetësor, teknologjia e informacionit, përpunimi i të dhënave. Në dekadën e ardhshme do të ketë një nevojë shumë të madhe për ata persona që përshtaten me këto degë”, shprehet Pashaj.
Përgjatë viteve të fundit, fushat më të kërkuara nga studentët janë “Biznes, administrim dhe ligj”, “Shëndet dhe mirëqenie”, si dhe “Inxhinieri, prodhim dhe ndërtim”.
Tv Klan
