Këshilli Bashkiak i Dibrës ka vendosur t’i japë titullin “Qytetar Nderi” kryeministrit Edi Rama, por ky i fundit e ka refuzuar. Siç njofton zyra e shtypit e Kryeministrisë, “Edi Rama ka qenë, mbetet e do jetë kundër titujve honorifikë për politikanët në detyrë.”
Nuk është publikuar ende motivi i dhënies së këtij titulli pikërisht nga bashkia e Dibrës për kryeministrin. Kryetar i kësaj bashkie është Muharrem Rama, i cili administron qytetin prej vitit 2016 kur fitoi zgjedhjet e parakohshme përballë Sherefedin Shehut. Ai zëvendësoi Shukri Xhelilin, pas skandalit seksual që u publikua në media.
Në një kohë kur kryeministri Edi Rama ka konfirmuar pjesën më të madhe të kryebashkiakëve që do të konkurrojnë për një mandat të dytë, nuk ka dhënë ende asnjë vendim për Muharrem Ramën./Opinion.al
