Sekretari i Përgjithshëm i Partisë Demokratike, Gazment Bardhi, ka zhvilluar ditën e sotme një takim me Kryesitë e Degëve të PD Dibër, Bulqizë dhe Mat.
Bardhi shkruan në një postim në rrjetet sociale se është shprehur para eksponentëve të PD së këtij qarku, se prioriteti i kësaj partie është dhënia fund e mungesës së legjitimitetit dhe të nxjerrë Shqipërinë nga kriza e thellë ekonomike.
Sekretari i Përgjithshëm i Partisë Demokratike, thekson se Dibra është dëshmitarë i krimeve elektorale të Qeverisë “Rama”, gjë e cila sipas tij, u shpërnda në të gjithë vendin.
Postimi i Bardhit
Gjatë takimit me Kryesitë e Degëve të PD Dibër, Bulqizë dhe Mat, shpreha mirënjohjen për sakrificën dhe betejën kundër të keqes nga banorët e qarkut Dibër dhe ritheksova se Partia Demokratike ka vetëm një prioritet: T’i japë fund kësaj krize të thellë mungese legjitimiteti dhe të nxjerrë Shqipërinë nga kriza e thellë ekonomike, që ka prekur qarkun Dibër dhe ka krijuar një krizë emigracioni të paprecedentë prej 30 vitesh.
Qarku i Dibrës më shumë se kushdo tjetër është dëshmitar i krimeve elektorale, ku Edi Rama testoi për herë të parë skemën e blerjes së organizuar dhe masive të votave në vitin 2016. Është kjo skemë që ka prodhuar një qeveri që punon vetëm për përfitimin e një grushti njerëzish në biznes dhe në qeveri. Ky model kriminal qeverisje duhet të marrë fund dhe qeverisja duhet t’u kthehet qytetarëve. Krimet elektorale duhet të ndëshkohen dhe prokuroria nuk mund të fshihet më!/ Opinion.al
