Një burrë nga Maqellara ka ngarkuar kalin me drogë dhe është nisur drejt Dibrës së Madhe në Maqedoni. Ai është konstatuar nga policia kufitare në mesnatë, pranë pikës kufitare të Bllatës. Policia ka arritur të kapë lëndën narkotike e cila ishte futur në çanta e qese (siç tregohet në foto). Nga peshimi rezultoi se ishin plot 122 kg kanabis sativa.
Referuar njoftimit të policisë mësohet se në afërsi të Piramidës E-14/ 3 e cila kufizohet me fshatin Kllobçisht të Maqellarës dhe me fshatin Banjisht, Komuna Dibër e Madhe (Maqedoni) është konstatuar një person që lëvizte me kafshë dore të ngarkuar me çanta të dyshuara me lëndë narkotike.
Shtetasi që transportonte lëndën narkotike porsa ka konstatuar që po e ndiqte policia ka braktisur kafshën e dorës dhe është larguar me shpejtësi duke përfituar nga terreni dhe errësira.
Shërbimet e Policisë Kufitare kanë kapur kalin e ngarkuar me 7 thasë, 5 çanta plasmasi dhe 2 qese plasmasi të zeza të mbushura me lëndë të dyshuar e llojit Cannabis sativa.
Policia thotë se është identifikuar dhe shpallur në kërkim shtetasi S.I, si autor i dyshuar për transportin e lëndës narkotike.
