Policia e Dibrës ka njoftuar se ish-drejtori dhe ish-përgjegjësi i ALUIZNI-t, në Drejtorinë Rajonale të këtij qyteti, do të procedohen penalisht.
Nga kryerja e veprimeve hetimore të deritanishme ka rezultuar se 56-vjeçari N.K, ish-drejtor dhe 37-vjeçari E.M, ish-Përgjegjësi i Sektorit ALUIZNI-t, duke qenë të emëruar në detyra drejtuese, kanë shpërdoruar detyrën duke iu sjellë përfitime të padrejta personave të tjerë, si dhe kanë dëmtuar interesat e ligjshme të shtetit në mbrojtjen dhe administrimin e territorit.
Po ashtu do të hetohen dhe 4 ish-zyrtarë të Llixhave pasi duke qënë të emëruar në detyra të ndryshme pranë Qendrës Balneare Dibër, me veprimet e tyre kanë sjellë si pasojë mos funksionimin normal të aktivitetit ekonomik dhe administrativ të qendrës, duke ju sjellë përfitime të padrejta personave të caktuar të administratës së ndërmarrjes, në bonuse transporti. Gjithashtu kanë shmangur nga taksimi mbi të ardhurat nga shpërblimet punonjësit e kësaj qendre, veprime të cilat kanë cënuar interesat e ligjshme duke i shkaktuar një dëm të konsiderueshëm ekonomik kësaj ndërmarrje./Opinion.al
