“Nëse kanë nevojë për dialog, të ulen. Rama e ka treguar që është për marrëveshje. Basha është mjaftueshëm i rritur për të gjykuar”. Kështu mendon deputetja socialiste Elona Gjebrea, sa i përket krizës politike që ka mbërthyer vendin.
Në një intervistë për Abcnews, deputetja socialiste ka thënë se rastet, kur ndaj kryeministrit është hedhur bojë dhe është goditur me vezë, janë shfaqje të shëmtuara.
“Dhuna nuk duhet të prevalojë në protesta që duhet të jenë demokratike. Kemi parë edhe ato shfaqje të shëmtuara në parlament, në veçanti ndaj zotit Rama. Është tentuar që mazhoranca të goditet në të gjitha format. Format e dhunës ishin të dukshme. Kam qenë vetë në seancën parlamentare edhe kam parë turma që me fjalor fyes tentonin të godisnin deputetët”.
Sa i përket shtyrjes së zgjedhjeve lokale, Elona Gjebrea e hedh poshtë këtë skenar ndërsa thekson se PS po bëhet gati. “Ne presim si do ndodhë situata. Nuk kemi dëshirë të jemi vetëm. Jemi të gjithë të motivuar për të punuar për zgjedhjet e ardhshme lokale. Ne do duam të kemi opozitën si kundërshtar. Ne kemi një datë të caktuar nga President. Çdo gjë është legjitime dhe ne do përgatitemi për zgjedhjet e 30 Qershorit”. /Opinion.al
