Kryeministri Edi Rama tha se opozita ka përjashtuar veten nga dialogu politik.
Pas mesazhit të ambasadorit të BE, Gonzato për dialog konstruktiv politik gjithëpërfshirës, Rama tha se ky është vetëpërjashtim absolut pa asnjë bazë faktike të lidhur me qëndrimet e mazhorancës.
“Problemi është që kur duhet të vallëzosh, duhen dy vetë. Dhe nuk hidhet vallja nëse të dy nuk duan ta hedhin vallen. Kush është për dialog sot, është shumë e thjeshtë. Kush është i gatshëm të flasë. Kush nuk është për dialog është shumë e thjeshtë, kush nuk është i gatshëm të flasë.
Ndjehen të përjashtuar, më vjen shumë keq, është vetëpërjashtim absolut pa asnjë bazë faktike të lidhur me qëndrimet tonë. Është zgjedhja e tyre legjitime. Jemi vend i lirë, demokratik, secili bën zgjedhjen e vet. Edhe zgjedhja për të vrarë veten… politikisht, është legjitime, nuk e ndalojmë dot“, tha Rama.
