A është e gatshme Partia Socialiste të bëjë një marrëveshje të minutës së fundit me opozitën për ta futur në zgjedhje? Taulant Balla thotë se respektimi i afateve është detyrim i çdo partie dhe se zgjedhjet e 30 qershorit do të mbahen.
“Respektimi i ligjit, i afateve janë detyrime të çdo aktori politik. Kjo nuk varet nga ne, por nga drejtuesit e partive opozitare. Ajo që dua të them është shumë e qartë, zgjedhjet e 30 qershorit do të zhvillohen. Arsyeja pse PD është jashtë Parlamentit nuk varet nga ne”, ka thënë Balla.
Ai ka shtuar se nëse Presidenti i Republikës kërkon të organizojë tryezë me partitë, PS është e hapur për çdo lloj dialogu, por pa shkelur Kushtetutën. Kreu i grupit parlamentar socialist përsëriti thirrjen se zgjedhjet e 30 qershorit do të mbahen dhe kujtoi Kodin Penal, se cilido që përpiqet të pengojë zgjedhjet dënohet nga pesë deri në tetë vite burg.
Pas takimit me deputetin gjerman, Balla tha se perspektiva evropiane e Shqipërisë është e qartë dhe se Gjermania është pro hapjes së negociatave me Shqipërinë.
“Kujtoj që Mali i Zi apo Serbia kanë hapur një sërë kapitujsh, por kur vjen kapitulli 23, me shtetin e së drejtës, Shqipëria ka bërë hapa të rëndësishëm, që përmblidhen në suksesin e reformës në drejtësi. I kemi të gjitha shanset për të marrë një përgjigje pozitive për përcaktimin e një date për fillimin e bisedimeve, vlerësohet roli i Shqipërisë si një faktor stabiliteti, bashkëndamë me kolegun gjerman edhe shqetësimet e përbashkëta për një rritje të ndikimit të vendeve dhe aktorëve të tjerë jashtë BE-së në Ballkan, por që pozicioni ynë është shumë i qartë: Shqipëria ka vetëm një plan “A”, vazhdim i reformave për anëtarësimin në BE”, ka thënë Taulant Balla në dalje të selisë së Partisë Socialiste./Opinion.al
