Ka ndërruar jetë në spital 23-vjeçari Marsel Osmani, nga Dishnica e Korçës, pasi u dhunua barbarisht nga pronari i një lokali. Ngjarja e rëndë u regjistrua dy ditë më parë në fshatin Dishnicë, ndërsa në dritë kanë dalë detaje të tjera.
Burime thonë për “News 24” se 23-vjeçari kishte shkuar në lokalin e shtetasit Olsi Zyberi. Por pas një konflikti për motive banale 23-vjeçari është rrahur barbarisht me hekura dhe dru. Më pas është tërhequr zvarrë me makinë dhe është hedhur në kanal.
Tortura e ushtruar ndaj të riut ka vijuar edhe më tej. Pronari i lokalit ka shkuar dhe e ka goditur në kokë me thikë, duke i shkaktuar plagë të rënda.
I riu u transportua drejt Spitalit të Traumës në kryeqytet, por ditën e djeshme ndërroi jetë si pasojë e plagëve të rënda që ka marrë për shkak të goditjes.
Ndërkaq, policia e Korçës ka arrestuar që ditën e ngjarjes autorin Olsi Zyberi, ndërsa materialet në ngarkim të tij i kanë kaluar prokurorisë së rrethit.
