Kryeministri Edi Rama ka përsëritur sot se do të ndërmerren ndryshime në Kodin Penal për të dënuar ashpër çdo akt dhune që ushtrohet ndaj mjekëve për shkak të detyrës. Këtë propozim ai e ka dhënë edhe më herët, por sot tha se kjo gjë do të shtrihet edhe në polici, në sport e më gjerë.
“Goditen mjekë, policë, punonjës të shtetit, përfaqësues të popullit për shkak të detyrës, por kjo nuk mund të kthehet në sport. Është e nevojshme për të ndërhyrë në Kodin Penal, po diskutojmë brenda grupit parlamentar dhe ministrisë së Drejtësisë. Rikonsiderimi i kanosjes ndaj bluzave të bardha është një domosdoshmëri. Përcaktimi i kufijve të spitaleve është domosdoshmëri, nuk mund të vijojnë t’u ngjajnë stacioneve te filmave Far West, ku nuk ka orë të caktuar për ata që shërbejnë dhe shërbehen. Mjekët nuk vrasin, por shpëtojnë jetë”, u shpreh ai.
Rama shigjetoi edhe opozitën, duke thënë se veprimet e saj kanë bërë që në publik dhuna të shihet si e vetmja alternativë demokraitke.
“Kjo është barbari që frymëzohet në një moment ku dhuna duket si i vetmi opsion demokratik, duke u predikuar nga lloj-lloj kadrinjsh”, tha Rama.
Kryeministri pati edhe një kritikë për policitë private, duke thënë se megjithëse është një industri e mirëfilltë, policët privatë punojnë në kushte shumë të vështira, me paga shumë të ulëta dhe me pak profesionalizëm.
“Industria e policimit privat është reale, por ta dini ju sa policisë privat ka Shqipëria do të tronditeni. Kemi një industri me standarde shumë të ulëta, me paga mizerabël, me nivel profesional skandaloz, me përgjegjshmëri zero. Po bëjmë një reformë me ministrinë e Brendshme, që ka propozuar krijimin e një kompanie të policisë së shtetit që të shërbejë fazë tranzicioni për shumë punonjës nga momenti që dalin nga sistemi drejt pensionit për të standardizuar policinë private për të vendosur rregulla striktike. Kur shikoj policët privatë në spitale më duket vetja si te ndonjë film i Kinostudios Shqipëria e Re që nuk u lejuan të shfaqen për mediokritet”, tha Rama./Opinion.al
