Partia Demokratike, të premten në darkë, ka reaguar për dhunimin e memorialit të Heroi të Demokracisë Azem Hajdari në Tiranë.
Përmes një deklarate për mediat, PD shkruan se memoriali është përdhosur ditën e sotme me shkarravinën-parullë “Rroftë Enver Hoxha.”
Ky memorial është ngritur në vendin ku Hajdari u ekzekutua në vitin 1998.
Nuk dihen ende autorët e kësaj ngjarje, por kjo parullë është shkruar jo pa qëlllim në memorialin e një prej njerëzve që ka një kontribut të veçantë në ndryshimet demokratike në Shqipëri.
Deklarata
Memoriali në kujtim të Heroit të Demokracisë, Azem Hajdari, është përdhosur sot me shkarravinën-parullë “Rroftë Enver Hoxha.”
Duke dënuar me forcë këtë akt të paprecedent, PD shpreh bindjen se frymëzuesit janë tek kryeministri që drejton vendin me metoda autoritariste dhe që shfaqet kudo me yllin e kuq bolshevik, të qepur në xhaketë.
Memoriali i Azem Hjadarit është dhunuar nga ata që mohojnë genocidin, kampet e torturave, glorifikojnë me emra rrugësh kriminelët dhe mbajnë yllin e kuq si simbol.
PD dënon rilindjen nga qeveria narko-enveriste e Edi Ramës të simboleve, mentalitetit dhe praktikës së diktaturës enveriste!
Endrra e dikurshme e Edi Ramës kryebashkiak për ta trajtuar Memorialin e Azem Hajdarit si një “lapidar pa leje që duhet shembur”, do të kthehet në makthin e një kryeministri që s’ka gardist që e mbron, nëse fajtorët e këtij provokimi të pafalshëm nuk vendosen para përgjegjësisë.
