Presidenti, Drejtori Sportiv dhe Shefi i Klubit Sportiv Kamëz janë arrestuar nga policia për ngjarjen e ndodhur në ndeshjen e futbollit Kamza – Laçi. Po ashtu në pranga ka rënë dhe një tifoz.
Gjithashtu nga verifikimet e bëra, policia thotë se si autorë të dyshuar për dhunën e ushtruar ndaj gjyqtarit të ndeshjes janë dhe 4 tifozë që janë shpallur në kërkim. Ata akuzohen për “Goditje për shkak të detyrës” dhe “Prishje e qetësisë publike”.
Policia po ashtu ka dhe një përgjigje për FSHF.
“Këtë ndeshje Komisariati i Policisë Nr. 5 Tiranë nuk e ka marrë përsipër, pasi nuk janë zbatuar detyrimet dhe përgjegjësitë sipas përcaktimeve të ligjit 79/2017 datë 27.04.2017 “Për Sportin”.
Megjithatë Komisariati i Policisë Nr. 5 Tiranë për sigurimin e rendit e sigurisë publike jashtë ambienteve të stadiumit, para, gjatë dhe pas zhvillimit të ndeshjes, hartoi plan masash. Kjo ndeshje është marrë përsipër për sigurimin e nga SH.R.S.F. “Oktapus 1 Security”, të cilët kanë qenë në stadium me 12 efektiv të saj.
Në përfundim të kësaj ndeshje një punonjës i SH.R.S.F., i cili ishte në hyrjen kryesore të stadiumit hapi portën dhe kërkoj ndihmën e policisë, pasi disa tifozë kishin hyrë në fushë dhe kishin goditur arbitrin dhe punonjësit e SH.R.S.F-së.
Pas këtij njoftimi shërbimet e planizuara me shërbim sipas urdhrit të shërbimit, janë futur në ambientet e stadiumit, duke bërë të mundur marrjen në mbrojtje të gjyqtarëve dhe vendosjen e rendit e qetësisë, duke vazhduar me shoqërimin e personave të futur në fushë dhe ata të cilët kishin goditur gjyqtarin e ndeshjes”, thekson Policia.
