Dhuna e ushtruar ndaj bluzave të bardha kohët e fundit, duket se ka detyruar ministren e Shëndetësisë dhe Mbrojtjes Sociale, Ogerta Manastirliu të vendosi rregulla të reja. Sipas një urdhri të ri të firmosur nga Manastirliu në shërbimet e urgjencës nuk do të lejohen personat e pa-autorizuar që nuk marrin shërbim shëndetësor.
Për familjarët dhe komunikimin me mjekët do të krijohen ambiente te posaçme, por nuk do të lejojnë familjarë në ambiente ku ofrohet shërbimi i urgjencës. Përjashtim bën rasti kur mjeku vlerëson praninë e një familjari.
Po ashtu janë përcaktuar orare fikse të vizitave të familjarëve. Konkretisht, vizitat e familjarëve në shërbimet me shtretër do të kryhen dy herë në ditë, paradite nga ora 12:00 – 13:00 dhe pasdite nga ora 17:00 -19:00. Ndërsa vizitat në shërbimin e reanimacionit spitalor për familjarët e pacientëve të shtruar në reanimacion do të kryhen dy herë në ditë në orën 11:00 – 12:00 dhe 18:00 – 19:00. Këto orare do të jenë të afishuara në çdo hyrje spitali dhe pavione. /G.F Opinion.al
