Gazetari David Kirkpatrick i “New York Times”, ish-korrespondent në Egjipt i gazetës prestigjioze amerikane, është ndaluar për më shumë se shtatë orë në aeroportin e Kairos dhe më pas autoritetet e kanë kthyer për në Londër pa asnjë shpjegim.
Ngjarjen e denoncon vetë “New York Times”, duke folur edhe për dhunën që ushtrohet në Egjipt ndaj mediave ku janë burgosur dhjetëra gazetarë.
Gazetarit, i cili së fundi ka botuar edhe një libër për Egjiptin me titull “Në duart e ushtarëve”, i është konfiskuar celulari duke i ndaluar kontaktet me jashtë dhe sipas gazetës amerikane nuk i është dhënë as ujë dhe as ushqim për shtatë orë.
48-vjeçari Kirkpatrick ka qenë korrespondent i “New York Times” në Kairo nga viti 2011 deri në 2015, periudhë gjatë së cilës u zhvilluan dy revolucione që sollën në pushtet ish-gjeneralin Abdel Fattah Al Sisi.
