Presidenti i Serbisë, Aleksandër Vuçiç ka konfirmuar tashmë zyrtarisht se djali i tij Danilo ishte i pranishëm në aktet e dhunës që ndodhën në qytetin Gelsenkirchen në Gjermani, në prag të ndeshjes mes Anglisë dhe Serbisë.
Ai ka thënë se nuk e sheh problem dhe nuk ka për çfarë t’i ankohet djalit të tij, i cili mori pjesë në konfliktin e tifozëve në Gjermani.
“Po, ai ishte në një kafene që u sulmua nga tifozë, kryesisht të kombësisë shqiptare edhe disa të tjerë. Ata u sulmuan me karrige dhe shishe”, u tha Vuçiç gazetarëve në ndërtesën e Presidencës.
Ai tha se ishte “interesante” që policia gjermane kërkoi edhe arrestimin e disa tifozëve serbë pas atij konflikti.
“Qasje interesante për zgjidhjen e problemeve, nuk e di se çfarë duhet të bëjë dikush kur dikush ju sulmon me karrige dhe shishe”, pyeti Vuçiç.
Sipas tij, tifozët serbë po mbroheshin, “në një vend ku ishin ulur të qetë, hanin e pinin”, dhe se janë sulmuar për shkak se në kafene ishte vendosur flamuri serb./Opinion.al
