Dhoma e Përfaqësuesve në SHBA ka miratuar dy projektligje në mbështetje të protestuesve në Hong Kong duke i dërguar Kinës paralajmërim për të drejtat e njeriut. Projektligjet janë dërguar në Shtëpinë e Bardhë pasi Senati i ka miratuar ato në mënyrë unanime.
Tashmë pritet që Presidenti amerikan, Donald Trump të nënshkruajë këto dokumente për t’i kthyer automatikisht në ligje, pavarsisht bisedimeve të ndjeshme për tregti që po zhvillohen mes Uashingtonit dhe Pekinit.
Trump ka 10 ditë kohë për të vendosur, ndërsa një burim i afërt me të tha për Reuters se presidenti do t’i nënshkruajë projektligjet.
Masat që kanë zemëruar Pekinin, i kërkojnë Departamentit amerikan të Shtetit të verifikojë të paktën një herë në vit nëse Hong Kongu vazhdon të ketë autonomi të mjaftueshme që të kryejë tregti me Shtetet e Bashkuara, të cilat i kanë ndihmuar të kthehet në qendër financiare botërore. Po ashtu parashikohet sanksionimi i zyrtarëve që janë përgjegjës për shkelje të të drejtave të njeriut.
Kujtojmë se qindra mijëra persona kanë protestuar në Hong Kong për më shumë se pesë muaj. Protestat janë shoqëruar vazhdimisht me dhunë dhe me arrestime./Opinion.al
