Kreu i KQZ Ilirjan Celibashi në konferencën për mediat foli edhe për votën e diasporës për zgjedhjet e 11 majit.
Një proces model e ka cilësuar Celibashi votën e diasporës, teksa u shpreh se me DHL-në u lidh një kontratë që i kurseu shtetit shqiptar 1.5-2 mln euro.
Ai deklaroi më tej se ka pasur problematika, por ato nuk cenojnë procesin që u zhvillua.
Pjesë nga deklarata e kreut të KQZ, Celibashi
Procesi i votimit nga jashtë pa hezitim ka shkuar shumë mirë. Ju kuptoj pretendimet e kujtdo. Ka pasur problematika. Duke i kalkuluar efektin e tyre mendoj se votimi nga jashtë është zhvilluar në mënyrë mode. Episodet e shpërndarjes së zarfeve në shtetin grek nuk e cenon këtë proces, si u organizua dhe integritetin. Jam i ndërgjegjshëm që për opozitën kjo gjë nuk qëndron kështu por jam i bindur. Kursimi i parave në lidhje me votimin nga jashtë nuk e ka cenuar standardin e këtij procesi. Janë 1.5-2 mln euro të kursyera vetëm për kontratën e lidhur me operatorin postar. Kemi kursime edhe nga aspekte të tjera të votimit, përfshi brenda vendit, 3 mln.
Kemi me qindra dhe me mijëra raste ku zgjedhësit kanë marrë fletën e votimit në përputhje me protokollin dhe kanë votuar dhe kanë sjellë fletën mbrapsht. Ka pretendime se sa është numri që nuk kanë marrë zarfin, nuk kanë votuat kanë votuar të tjerë. Ka spekulime. Kemi përgjegjësi si institucion me zgjedhjen e operatorit të shërbimit postar. Kemi zgjedhur më të mirin në botë. Duke e paguar këtë shërbim me sa më pak para e mundur. Kemi ndërtuar një kontratë, shumë të mirë. Është një çështje që nuk ka përfunduar akoma.
Janë me mijëra votues që konfirmojnë këtë çfarë thashë me mënyrën e organizimit të këtij procesi. Krahasuar me shumë vende të tjera., nuk flas për rajonin, është absolutisht i krahasueshëm me një proces të tillë të organizuar në vendet me demokraci perëndimore. Problemet me dërgesat postare do adresohen nga institucione të tjera.
