Ministri i Drejtësisë i Kosovës, Abelard Tahiri, konfirmoi se disa kosovarë, përfshirë gra dhe fëmijë, që kanë qenë në zonën e konfliktit në Siri, janë kthyer të premten mbrëma në Kosovë.
Tahiri, i cili foli nga Aeroporti Ndërkombëtar i Prishtinës, tha se hollësitë do të publikohen gjatë së shtunës, ndaj nuk dha detaje të tjera.
“Operacioni i planifikuar për kthimin e disa qytetarëve tonë nga Siria tashmë ka përfunduar me sukses”, tha Tahiri.
Të kthyerit nga Siria janë larguar nga Aeroporti “Adem Jashari” në orët e para të së shtunës, për t’u dërguar në ish-bazën ushtarake në fshatin Vranidoll, në periferi të Prishtinës, ndërsa shoqëroheshin nga policia.
Kujtojmë se kthimi i tyre erdhi pas thirrjes së bërë javë më parë, nga presidenti amerikan, Donald Trump, i cili u ka kërkuar vendeve në Evropë që t’i marrin dhe gjykojnë luftëtarët e grupit militant Shteti Islamik.
Në një raport të publikuar në muajin shkurt, Qendra Kosovare për Studime të Sigurisë ka nxjerrë në pah se qytetarët e Kosovës nuk e dëshirojnë kthimin e luftëtarëve të huaj në vend, pasi i konsiderojnë si shqetësim për sigurinë, ndërsa të kthyerit nga Siria rrezikojnë deri në 15 vjet burgim, sipas një ligji të hartuar në vitin 2015, i cili u ndalon kosovarëve të marrin pjesë në luftëra të huaja./Opinion.al
