Mediat në Maqedoninë e Veriut raportuan ditën e sotme se policia maqedonase ka zbuluar një “fabrikë” droge në fshatin Orovnik të Ohrit.
Sipas raportimeve të para, thuhet se janë zbuluar 3 000 rrënjë marijuanë, 100 litra vaj kanabisi si dhe 600 kg kanabis i tharë.
Vlerësimet e para të policisë maqedonase flasin se vlera e drogës së konfiskuar është shumë e madhe.
Mësohet se fabrika ka qenë e regjistruar si filialë e kompanisë Greenego 2018 nga fshati Drsllajcë i Strugës, por nuk ka pasur licencë për prodhim të marijuanës.
Sipas mediave maqedonase, në këtë aksion janë arrestuar 10 persona. Gjithashtu ato raportuan se në mesin e të arrestuarve është edhe dhëndëri i kryetarit të Bashkisë Pogradecit. Sipas tyre, dhëndri i kryebashkiakut ka qenë pronar i fshehur i kësaj “fabrike”.
Ndërsa menjëherë pas këtij lajmi ka ardhur edhe reagimi i kryebashkiakut të Pogradecit, Ilir Xhakolli.
Në një prononcim për “New24”, kryebashkiaku ka mohuar lajmin se dhëndri i tij është mes të arrestuarve për fabrikën e drogës në Ohër.
“Nuk e di si kanë dalë këto lajme, emri i dhëndrit nuk është i përfshirë. Ai momentalisht është me pushime në Turqi”,-ka thënë kryebashkiaku socialist.
