Fatmir Xhafaj dha dorëheqjen paraditen e së shtunës nga posti i Ministrit të Brendshëm. Por pavarësisht kësaj, ai është parë të punojë në zyrën e tij edhe gjatë kësaj të diele.
Xhafaj nuk do të largohet nga detyra derisa presidenti Meta të dekretojë zëvendësuesin e tij, Sandër Lleshi. Pas dekretimit, Lleshi duhet të bëjë edhe betimin në Parlament.
Në një reagim pasditen e së shtunës, Xhafaj shkroi në “Twitter” se nuk ishte ndikuar nga askush për dorëheqjen e tij.
“I siguroj të gjithë se dorëheqja ime është tërësisht me vullnetin tim të lirë dhe e bazuar në parime dhe vlera njerëzore e institucionale. Ajo është tërësisht respekt për veten, e për këto standarde të shenjta për mua”, shkruante ai.
Edhe një ditë më parë, Xhafaj shkoi në zyrën e tij rreth orës 11:57 të mesditës, ku qëndroi për gati 9 orë. Gazetarët qëndruan në pritje të një prononcimi nga ish-ministri, por Xhafaj nuk pranoi të flasë për ta./Top Channel
