Kolonel Hoze Luis Silva, Atasheu ushtarak venezuelian në Uashington është i pari ushtarak i lartë që braktis Presidentin Nikolas Maduro. Në një intervistë për mediat amerikane, Silva shprehu publikisht mbështetjen për Presidentin e përkohshëm të vetëshpallur Huan Guaido, i njohur nga Shtetet e Bashkuara, Gjermania e disa vende të tjera të botës, përfshirë edhe Shqipërinë. Duke e konsideruar Maduron si diktator, koloneli u bëri thirrje ushtarakëve në Venezuelë të ndjekin shembullin e tij.
“I bëj thirrje vëllezërve të Forcave të Armatosura të kombit të njohin Huan Guaidos si President legjitim”.
Ministri venezuelian i Mbrojtjes shpalli publikisht besnikërinë e Ushtrisë ndaj Nikolas Maduros, pas protestave të kësaj jave kundër Presidentit majtist. Kreu i opozitës, Huan Guaido, u vetëshpall President i përkohshëm mes turmës masive të protestuesve në Karakas, duke e konsideruar të jashtëligjshme rizgjedhjen e Maduros President për një mandat të dytë, më herët gjatë këtij muaji.
Presidenti amerikan Donald Trump nuk përjashtoi mundësinë e një ndërhyrjeje ushtarake në Venezuelë, nëse qeveria vijon të shtypë me dhunë protestat, gjatë të cilave janë vrarë më shumë se 20 persona.
Tv Klan
