Tenderi me vlerë mbi 86 milionë Lekë për blerje të pajisjeve për kanalin “RTSH Agro” që çoi në pranga ish-drejtorin e RTSH-së Thoma Gëllçi kaloi në dorën e disa institucioneve kontrolluese. Fillimisht shkeljet u kallëzuan nga kompania humbëse dhe më pas u konstatuan edhe nga një audit i Kontrollit të Lartë të Shtetit.
Tv Klan zbardh detaje të reja nga dosja e SPAK, ku rezulton se pas shpalljes së fituesit, kompania humbëse ankimoi vendimin pranë Agjencisë së Prokurimeve Publike. Ky institucion nuk pranoi ankimin, ndërsa të njëjtin vendim rezulton se ka dhënë edhe Gjykata Administrative, e cila nuk ka pranuar kërkesën për pezullim e zbatimit të kontratës për fituesin.
Por paralelisht me dy institucionet që verifikuan pretendimet administrative të kompanisë humbëse, në janar të 2019-ës, Prokuroria kishte regjistruar një procedim penal, duke vërejtur se fondet publike për tenderin në fjalë “nuk ishin kanalizuar drejt ofertuesit më të mirë”.
SPAK rendit si shkelje kryesore zgjatjen e afatit 45-ditor të dorëzimit të materialeve, me urdhër të firmosur nga ish drejtori Thoma Gëllçi, si dhe faktin që anëtarët e KVO-së kanë shpallur fitues një kompani që nuk plotësonte kriteret. Të tjera shkelje janë konsideruar edhe nisja e tenderit 2 vjet përpara se AMA të jepte licencën për hapjen e një kanali të ri dhe 1 përpara se RTSH Agro të niste transmetimet.
Zyrtarët e RTSH pritet të dalin të hënën para Gjykatës së Posaçme për vlerësimin masën e sigurisë “Arrest në burg”.
Tv Klan
