Zbardhen detaje të reja nga arrestimi i efektivit të Policisë në Policinë e Tiranës nga SHÇBA për kanosje.
Sipas prokurorisë efektivi i policisë i arrestuar me akuzën e kanosjes për dhënie të pasurisë, gjatë dy muajve të fundit kishte hyrë në kontakt me një shtetas që kërkonte të blinte 20 kilogramë lëndë narkotike kanabis sativa, mëson “Panorama”.
Polici ka pranuar ta gjente drogën kundrejt një pagese dhe këtë gjë e ka realizuar duke siguruar 20 kilogramë kanabis në mënyrë ende të paqartë me njohjet e tij.
Pasi e ka bërë këtë veprim ai ka njoftuar “porositësin” por ai i ka thënë se ka ndryshuar mendje dhe nuk do ta marrë drogën, mëson “Panorama”.
Në këtë kohë polici ka nisur kërcënimet duke thënë “unë punën e bëra”, “më ngelet droga në dorë”, dhe i ka kërkuar personit tjetër 11.500 euro.
I ndodhur përballë kërcënimeve që kanë vazhduar për disa javë, qytetari ka bërë denoncim tek SHCBA në ministrinë e brendshme. Kjo strukturë pas hetimeve ka referuar rastin në prokurorinë e krimeve të rënda.
Deri tani nga kontrollet e ushtruara nuk është gjetur lënda narkotike që efektivi i policisë kishte siguruar.
Emri/ Arrestohet polici, kërcënoi një person “12 mijë euro, ose të vrava”
Një agjent i trupës operacionale, në Drejtorinë Vendore të Policisë Tiranë është arrestuar nga kolegët e tij pasi u zbulua se ai ka kërcënuar me vrasje një shtetas me qëllim që të përfitonte prej tij shumën e 12 mijë eurove.
Mbi bazën e hetimeve të kryera nga Drejtoria e Shërbimit për Çështjet e Brendshme dhe Ankesat, Tiranë, me kërkesë të Prokurorisë për Krimet e Rënda, Gjykata e Shkallës Parë për Krimet e Rënda vendosi masën e sigurimit personal “Arrest me burg”, ndaj punonjësit të Policisë Inspektor Emiljan Prenga, me detyrë agjent i trupës operacionale, në Drejtorinë Vendore të Policisë Tiranë.
Në ngarkim të këtij punonjësi policie, Prokuroria pranë Gjykatës së Shkallës së Parë për Krimet e Rënda, ka regjistruar procedimin penal për veprën penale të “Shtrëngimit me anë të kanosjes ose dhunës për dhënien e pasurisë” të parashikuar nga neni 109/b të K.Penal.
Nga hetimi i zhvilluar nga ana e SHÇBA-së Tiranë, duke përdorur metoda speciale të hetimit u provua se punonjësi i Policisë Prenga duke shfrytëzuar edhe detyrën ka kanosur në mënyrë serioze për jetën një shtetas, me qëllim marrjen e një shume prej 12 mijë eurosh.
Nga ana e SHÇBA-së u bë ekzekutimi i masës së sigurimit personal “Arrest në burg” për këtë punonjës policie për veprën penale të “Shtrëngimit me anë të kanosjes ose dhunës për dhënien e pasurisë”./T. Sokolaj/Panorama
