Dy mikesha janë ndarë keqazi në aeroportin e Rinasit, ende nuk dihen motivet e verteta që çuan dy vajzat e reja në një përleshje të dhunshme fizike në mes të terminalit, duke shokuar shumë qytetarë të pranishëm. Gazetat shkruajnë sot se 19 vjeçarja franceze kishte ardhur si mike në familjen e vajzës shqiptare ku kishte qendruar rreth një jave. Ndërkohë ditën e shtunë kur do të kthehej ajo ka humbur avionin dhe për këtë ka fajësuar mikeshën shqiptare. Këtu ka lindur edhe sherri mes tyre.
Ato janë të dyja studente në Francë. Prej disa ditësh, francezja me iniciale H.D. kishte ardhur në Shqipëri me ftesë të shoqes së saj nga Tirana me iniciale K.D.
Incidenti ka ndodhur pikërisht në ditën kur shoqja nga Franca po largohej përmes aeroportit të Rinasit. Disa minuta vonesë ka bërë që vajza e huaj të humbasë fluturimin, pasi avioni me të cilën ajo do të udhëtonte ishte ngritur në ajër. Për këtë arsye, ajo ka fajësuar shoqen e saj, të cilën e ka sulmuar fizikisht, duke e goditur me grushte e duke e kapur nga flokët.
Burime nga Policia thanë se u desh ndërhyrja e efektivëve të Policisë Kufitare që dy vajzat, njëra 19 e tjetra 20 vjeçe, të lëshonin njëratjetrën. Ndërsa pas këtij momenti, vajza shqiptare, e cila ishte edhe e dëmtuara në këtë histori, nuk deshi ta linte me kaq. Ajo u drejtua për në Komisariatin e Rinasit, ku bëri kallëzim për vajzën franceze, e cila në fakt ishte shoqja dhe mysafirja e saj në Shqipëri.
Policia e Shtetit tha dje se vajzat që u përfshinë në këtë konflikt fizik janë 19vjeçarja nga Franca, me iniciale H.D. dhe 20¬vjeçarja shqiptare banuese në Tiranë, me iniciale K.D, raporton “Panorama” . Kjo e fundit ka denoncuar për dëmtime të tjera me dashje shtetasen e huaj, ndaj së cilës mësohet se ka nisur procedim penal nga Komisariati i Kufirit dhe Migracionit të Rinasit. /Opinion.al
