Të paktën 60 nxënës të shkollës së mesme në Shupenzë u ndjenë keq dhe u asfiksuan gjatë orës së mësimit, për shkak se në godinë u përhap tymi i kaldajës.
Një 16-vjeçare dhe një mësues i shkollës së mesme të Shupenzës janë transportuar nga Dibra në Qendrën Spitalore Universitare “Nënë Tereza” me dy helikopterët e vënë në dispozicion nga Ministria e Shëndetësisë dhe Mbrojtjes Sociale.
Deri në këto çaste mësohet se 34 nxënës po marrin ndihmë mjekësore në spitalin e Bulqizës dhe ndodhen jashtë rrezikut për jetën dhe 25 nxënës po marrin ndihmë mjekësore në spitalin e Peshkopisë, të cilët ndodhen jashtë rrezikut për jetën.
(Foto nga spitali i Bulqizës)
Burime nga policia bënë me dije se ngjarja ndodhi në momentin që janë ndezur kaldajat me lëndë drusore për ngrohjen e ambientit, ndërkohë që oxhaku i shkollës ka qenë i bllokuar.
Për pasojë, tymi është shpërndarë në ambientet e brendshme të shkollës duke shkaktuar ndotje të ambientit.
Mësohet se grupi hetimor po vazhdon punën për zbardhjen e plotë të shkaqeve të ngjarjes.
Ministria e Shëndetësisë pak minuta pas ngjarjes ka sqaruar se gjendja aktuale e të gjithë nxënësve që në këto momente po trajtohen në spitale është nën kontroll dhe nën monitorim të vazhdueshëm.
“Gjithashtu Ministria e Shëndetësisë dhe Mbrojtjes Sociale ka vënë në dispozicion Njësinë e Helikopterëve në rast se do të jetë e nevojshme transporti për mjekim më të specializuar në Tiranë”, -thuhet në njoftimin e ministrisë.
Opinion.al gjatë ditës së sotme ka komunikuar me spitalin e Bulqizës dhe atë rajonal të Peshkopisë nga ku u bë me dije se nxënësit janë jashtë rrezikut për jetën.
Gjithashtu, të njëjtat burime treguan se ata janë paraqitur në spitalet përkatëse me marrje mendësh, provokim të vjellash, si dhe këputje të trupit. Përveç nxënësve në spitalin e Peshkopisë janë paraqitur edhe dy mësuese.
Pas mjekimit, disa nxënës janë kthyer në shtëpi, por mësohet se gjendja e tyre është përkeqësuar dhe iu është dashur edhe njëherë rikthimi në spital.
Dëshmitarë në vendngjarje, treguan për Opinion.al se gjatë kohës që fëmijët ishin në mësim, teknikët po bënin prova për të vënë në punë kaldajën e re të ngrohjes që punon me pelet. Të të njëjtat burime thanë se kaldaja ditën e sotme është vënë në punë për herë të parë.
Në ato momente dyshohet se diçka nuk ka funksionuar siç duhet dhe nga kaldaja është çliruar tym ose gaz, detaje këto që natyrisht do t’i zbardhë hetimi.
Ministria e Arsimit ka reaguar pas disa orësh nga publikimi i ngjarjes në media, duke theksuar se ministrja Nikolla ka kërkuar nga të gjithë drejtuesit rajonalë të arsimit ngritjen e një inspektimi në bashkëpunim me pushtetin vendor për verifikimin e kaldajave, gjatë kësaj fundjave në të gjitha shkollat.
Referuar njoftimit për mediat, po ashtu, edhe në shkollën “Rifat Manjani” bëhet me dije se mësimi nuk do të fillojë pa bërë ritestimin e kaldajës./Opinion.al/
