Zyrtarisht në Shqipëri janë janë konfirmuar në total 10 persona të prekur nga koronavirusi, nga të cilët katër janë identifikuar në rezultatet e analizave të sotme. Sipas Zv.Ministres së Shëndetësisë Mira Rakacolli, një prej pacientëve të prekur ndodhet në spitalin e Durrësit, tre në spitalin infektiv dhe 6 të tjerë janë duke u vetëizoluar në shtëpi.
E pyetur nëse për pacientët e rinj është bërë hetimi epidemiologjik, Zv. Ministrja tha se këtë po e bëjnë epidemiologët. Gjithashtu, Zv. Ministrja tha se 6 prej personave të prekur janë persona që kanë patur kontakt me 2 të infektuarit e parë, që u deklaruan në vend.
Por çfarë do të ndodhte në skenarin më të keq të menduar?
Ndonëse nuk ju përgjigj pyetjes së gazetarëve, për numrin e saktë të shtretërve të siguruar në spitalin infektiv për pacientët që mund të preken në vijim, Zv.Ministrja Rakacolli kërkoi që gjërat të merren me qetësi dhe logjikë, pasi aktualisht në spital janë vetëm 3 persona të shtruar. Duke llogaritur edhe faktin që një pjesë e tyre do të shërohen në vijim, Ministrja parashikoi që shtretërit të jenë të mjaftueshëm edhe në një skenar të ngjashëm me Italinë.
“Nëse mbushet infektivi do të kemi edhe spitalin “Shefqet Ndroqi”, që do të vihet në shërbim. Kemi menduar krahas shërbimit të kovidit, se nuk do të ndërpritet shërbimi i pacientëve me sëmundje të tjera”, tha Rakacolli.
Ndërkohë, gjatë daljes për mediat Drejtoresha e ISHP Albana Fico, deklaroi se aktualisht Shqipëria ka 2500 kite për të realizuar analizat e të dyshuarve, ndërsa sot do të firmoset edhe vendimi për të sjellë 1 mijë kite të tjera./Opinion.al
