Ashtu siç dihet nesër në orën 11:00 opozita ka thirrur qytetarët në protestë. Me kalimin e orëve, mësohen edhe detajet. Kështu, protesta do të jetë në formë marshi, që nis në krye të Bulevardit të Dëshmorët e Kombit. Drejtues të Partisë Demokratike kanë kontaktuar me drejtues të policisë në mënyrë që qytetarët të mos pengohen t’i bashkohen protestës. Policia nga ana e saj ka bërë të ditur se do jetë në shërbim të përforcuar me 1500 efektivë në terren.
Vet konceptimi i protestës si marshim i jep asaj një natyrë tjetër nga ajo e 27 janarit, ku u protestua kundër kapjes së drejtësisë nga qeveria pas zgjedhjes nga mazhoranca të Arta Markut si kryeprokurore e përgjithshme e përkohshme.
Po kështu gjatë protestës do të ketë demonstrime simbolike për ministrin Xhafaj dhe vëllanë e tij të dënuar për drogë në Itali.
Gjithashtu mësohet se nuk do të ngrihet përpara Kryeministrisë skena gjigande që jemi mësuar të shohim në protestat e mëparshme. Marshimi pritet të kulmojë me një fjalë të kreut të opozitës Lulzim Basha.
Kjo protestë e thirrur një javë më parë nga Lulzim Basha, përkon me vizitën e rëndësishme në Tiranë të Pit Marocos, zv.ndihmës Sekretar Amerikan i Shtetit.Po kështu gjermani Florian Hahn zhvilloi një vizitë në Tiranë, ndërsa aktualisht takime të nivelitët të lartë po zhvillon kreu i asamblesë parlamentare dhe sekretari i përgjithshëm i OSBE-së.
