Disa detaje të reja kanë dalë në dritë lidhur me vrasjen e Gjergj Krygjës një ditë më parë në fshatin Sume të Dukagjinit.
Ka dyshime se 43-vjeçari ka qenë i dënuar në Itali për lëndë narkotike dhe është deportuar në Shqipëri nga autoritet italiane më pak se një vit më parë. Mësohet gjithashtu se 43-vjeçari para afro 2 vitesh ka qenë i shpallur në kërkim nga autoritetet shqiptare pasi dyshohet se kultivonte lëndë narkotike në zonën e Dukagjinit.
Gjergj Krygja u vra ditën e djeshme teksa kishte shkuar në fshat për të mbledhur prodhimet e dimrit që ka në tokat bujqësore, por është qëlluar për vdekje me armë zjarri në afërsi të banesës që ka në fshat.
Mendohet se autorët e vrasjes e kanë ruajtur viktimën dhe sapo e kanë parë vetëm e kanë qëlluar me automatik dhe më pas kanë lëvizur me këmbë.
Kujtojmë që kjo është vrasje e dytë që ndodh në Dukagjin, brenda pak javësh, pasi më 21 tetor u ekzekutua 55-vjeçari Lazër Arraj. Ky i fundit u vra nga kushëriri i tij, Marash Arraj, për shkak të disa konflikteve familjare./Opinion.al
