Vdiq nga mbidoza apo e vranë? Mediat greke kanë zbuluar detaje të reja në lidhje me 34-vjeçarin shqiptar Bandiol Tusha, i cili u gjet i vdekur në qelinë e tij në burgun e Koridhalos në Greqi më 27 Janar 2019.
Vdekja e 34-vjeçarit fillimisht u konsiderua e shkaktuar nga mbidoza. Por pas ekspertizës mjeko-ligjore, u arrit në konkluzionin se Bardhyl (Bandiol) Tusha ishte mbytur. Në fotot që ka publikuar CNN-i grek, duken shenjat e dhunës së ushtruar ndaj shqiptarit.
Në raportin e mjekut ligjor, evidentohet se viktimës fillimisht i është zënë goja dhe hunda për të mos marrë frymë, e më pas autori i ka vendosur dorën në fyt duke e mbytur.
Sipas mediave greke, Bardhyl Tusha ka qenë pjesë e “Mafies së burgjeve”. Dyshohet se 34-vjeçari u kishte ofruar strehim dy të dyshuarve për vrasjen e avokatit grek Mixaleis Zafeiropoulos.
Për shkak të hetimit kompleks të kësaj dosje, hetuesit dyshojnë se u dha urdhri për vrasjen e Bardhyl Tushës, në mënyrë që ky i fundit të mos fliste./ Opinion.al
