Kanë rifilluar mëngjesin e sotëm kërkimet në Liqenin e Shkodrës për tre personat që humbën jetën dje si pasojë e përmbysjes së një varke në pjesën malazeze.
Sipas mediave malazeze, pjesëtarët në varkë janë nga familja Kumburovic nga qyteti i Zetas, ku kanë humbur dy bashkëshortët Jane dhe Ratko si edhe vajza e tyre Nina.
Po kështu në këtë ngjarje ka humbur jetën edhe Darko Vujosevic, i cili u fut për ti shpëtuar.
Deri më tani nga kërkimet është gjetur vetëm trupi i gruas Jane Kumburovic, ndërkohë që vazhdojnë kërkimet intensive për të mbyturit e tjerë.
Të vetmit që kanë shpëtuar nga kjo tragjedi janë pjesëtarë të familjes Rasovic, që gjendeshin në varkë; Vanja, Radojica dhe Liljana si edhe një prift.
Aktualisht për gjetjen e trupave, është vënë në kërkim edhe një helikopter.
Sipas të dhënave mbi ngjarjen, nëna Jane u hodh në liqen për të shpëtuar të bijën Nina, ndërsa babai Ratko për të shpëtuar dy pjesëtarët e familjes së tij.
Në këtë moment për të ndihmuar personat që po mbyteshin është hedhur në liqen edhe Darko Vujosevic, i cili edhe ky humbi jetën.
Varka po kryente një shëtitje në liqen, kur mesa duket është përmbysur, si pasojë e dallgëve të mëdha.
Ndërsa personat e tjerë kanë mundur të shpëtojnë me not, duke dalë në breg. D.l
