Shoqëria civile u mblodh mbrëmë në protestë kundër Velieres në Durrës. Edhe pse ishte parashikuar që protesta të zgjaste gjatë gjithë natës deri në mëngjes, ajo degjeneroi në sherr e grushte pas mesnate, duke çuar në dështimin e saj. Në fillim u raportua se kanë qenë të përfshirë anëtarë të grupit të shoqërisë civile të drejtuar nga ambientalisti Sazan Guri dhe një grup i Forumit Rinor të PD-së. Por duket se nuk është kështu…
Vetë Sazan Guri në një prononcim për Opinion.al thotë se grupi që iu bashkua protestës është një organizatë që drejtohet nga Edviol Kulluri dhe që i thonë vetes “Organizata Udhëheqëse deri në fitoren finale të Revolucionit”.
Ai tregon se “rreth 60 persona nga shoqëria civile u mblodhën mbrëmë rreth orës 21:00 përpara Torres Veneciane. 30 minuta më pas na u bashkuan edhe disa persona të tjerë të drejtuar nga Edviol Kulluri, sepse protesta ishte e hapur për këdo”.
Por rreth orës 23:00 teksa të rinjtë po konsumonin nga një sufllaqe plas sherri. “Një djalë goditi me shkop një vajzë për shkaqe banale. Më tej në sherr u përfshinë edhe të tjerë, dhe një person ka mbetur i lënduar më rëndë”, tregoi Sazan Guri.
“Kemi njoftuar policinë e cila po heton ngjarjen”, vijoi ai. Ky fakt u konfirmua për Opinion.al edhe nga zëdhënësja e policisë së Durrësit.
Kësisoj pas sherrit, që siç thotë Sazan Guri nisi për shkaqe banale, protestuesit u shpërndanë.
Në sherr u përfshinë të rinj nga shoqëria civile e drejtuar nga Guri dhe të rinj nga organizata e drejtuar nga Kulluri.
Në një status në facebook, deputeti demokrat i Durrësit, Oerd Bylykbashi tha se ata që provokuan sherrin janë të shtyrë nga Dako dhe Rama për të prishur protestën e qytetarëve kundër ndërtimit të Velieres. “Këto grupime të komanduara nga Rama dhe sharlatanet prane tij po kthehen ne rrezik per protestuesit paqesore qe protestojne kunder kesaj qeverie banditesh dhe kriminelesh”, shkruan ai.
Ne jemi interesuar në policinë e Durrësit për të mësuar më shumë për ngjarjen dhe emrat e personave përgjegjes. Zëdhënësja konfirmoi faktin se ka patur një konfiklt mbrëmë përpara Torres Veneciane dhe policia ka marrë në pyetje disa persona. Emrat e te proceduarve, tha ajo, dhe shkaqet e ngjarjes do ti publikojmë gjatë ditës së sotme. /R. Dedaj- Opinion.al
- Status Lorisa Ylli nga shoqeria civile
2. Status Edviol Kulluri nje nate me pare
3. Status Oerd Bylykbashi, deputet i PD
