Detaje të reja janë zbuluar nga ngjarja tragjike e 31 dhjetorit në Australi, ku një baba shqiptar vrau vajzën dhe dhëndrin, pasi e bija dhe bashkëshorti i saj, vendosën që të fillonin një jetë të re larg tij.
Veton dhe Lindita Musai sapo ishin kthyer në shtëpi nga festimi i përvjetorit të tyre të parë të martesës, kur 55-vjeçari Osman Shaptafaj, i inatosur me vendimin e së bijës për t’u larguar nga shtëpia shkoi në banesën e tyre të re në Yarraville. Në momentin që e bija hapi derën pas disa trokitjeve, ai e qëlloi me armë zjarri duke e lënë të vdekur në vend. Ndërsa më pas ai qëlloi edhe dhëndrin e tij që ndërroi jetë në spital.
Shaptafaj, jetonte vetëm 5 km larg çiftit, dhe u gjet pas një blloku banesash me plagë arme në kokë, pasi tentoi vetëvrasjen. Ai ndodhet në spitalin e Melburnit në gjendje kritike për jetën.
Duket se marrëdhënia mes tyre ishte e komplikuar prej kohësh, pasi bazuar në informacionet e të afërmëve, i ati i vajzës nuk ka qenë i ftuar në as fejesën e çiftit dhe as në dasmën e tyre.
Ndërkohë, kjo është ngjarja e dytë e rëndë që ndodh në Australi në pak kohë në familjet shqiptare, pasi në gusht të vitit që lamë pas, një baba vrau vajzën e tij pasi frekuentonte klubet e natës me shoqërinë./Opinion.al
