Janë zbardhur detaje të reja nga ngjarja e rëndë e ndodhur dje në qytetin e Beratit, ku një çift të moshuarish u hodhën nga kati i gjashtë i pallatit, ndërsa gjetën vdekjen e menjëhershme.
Fëmijët e dy viktimave Kujtim dhe Këze Agalliu, i kishin sistemuar dy prindërit e moshuar në një apartament të ri dhe të ngrohtë për dimrin, duke i hequr ata nga jeta e mundimshme në fshat.
Por duket se kjo nuk u ka pëlqyer aspak vetë të moshuarve, çka është bërë shkak edhe për këtë ngjarje të rëndë.
Sipas Policisë, nga hetimet paraprake dyshohet se 78- vjeçari Kujtim Agalliu, mëngjesin e së premtes rreth orës 07:00, ka shtyrë gruan e tij nga ballkoni i katit të tetë ku banonin dhe vetëm pak sekonda më pas është hedhur edhe vetë.
Të dy kanë gjetur vdekjen në vend. Pallati i ri ku ndodhi ngjarja ndodhet në lagjen “30 vjetori” në qytetin e Beratit.
Policia bën të ditur se trupat e pajetë janë konstatuar nga fqinjët, të cilët kanë parë dhe skenën e ngjarjes së tmerrshme.
Mësohet se çifti i të moshuarve kishte vetëm pak muaj që ishte zhvendosur në këtë apartament.
Të katër fëmijët e tyre mësohet se ndodhen jashtë vendit, ndërsa për t’u kujdesur për prindërit ata kishin paguar edhe një grua, e cila në momentin e ngjarjes nuk ka qenë e pranishme.
Çifti Agalliu kishte vetëm 5 muaj që jetonte në këtë pallat, pasi u larguan në qershor nga fshati Qerreshnik të Beratit, ku kishin kaluar gjithë jetën e tyre.
Fëmijët që jetojnë në Itali dhe në Greqi u kishin blerë një apartament, me idenë për t’u krijuar kushtet më të favorshme për pleqërinë e tyre.
Kjo, pasi siç banorët tregojnë, 78-vjeçari ishte person me probleme psikike dhe merrte edhe mjekim për një gjë të tillë.
Përveç skizofrenisë së Kujtim Agalliut, bashkëshortja e tij po merrte mjekime për një tumor në kokë, pasi më parë u ishte nënshtruar dy ndërhyrjeve kirurgjikale.
Gjendja për shkak të sëmundjeve, prania larg fëmijëve, por edhe mospërshtatja me jetën e re në qytet, duket se kanë qenë arsyet që çifti i të moshuarve t’i jepte fund jetës me anë të vetëvrasjes.
Banorët e pallatit ku ndodhi ngjarja japin dy versione. Një nga dëshmitarët ka deklaruar për Policinë se, fillimisht burri ka shtyrë gruan dhe vetëm pak sekonda më pas është hedhur edhe vetë.
Por ndërkohë, një tjetër dëshmitar okular ka thënë se çifti ishte i kapur për dore në momentet e rënies nga lartësia.
Nga ana e saj, Policia ka nisur hetimet për zbardhjen e plotë të rrethanave. Pista kryesore mbetet ajo e vetëvrasjes në kushte të rënduara psikologjike, ndërsa nuk përjashtohet dhe mundësia që burri të ketë vrarë gruan dhe më pas ka kryer dhe vetëvrasje.
“Më datë 30.11.2018, rreth orës 07:00, në vendin e quajtur ‘Pjeshkorja’, në lagjen ’30 Vjetori’, Berat, shërbimet e patrullës konstatuan një çift të moshuarish, të cilët dyshohet se janë hedhur nga kati i gjashtë i pallatit, duke gjetur vdekjen.
Shërbimet e Policisë, grupi hetimor po punojnë për identifikimin e tyre”, bëhet e ditur zyrtarisht nga Policia.
Pas ngjarjes së rëndë janë lajmëruar edhe fëmijët e dy viktimave, të cilët sipas të afërmve janë nisur për t’u dhënë lamtumirën e fundit prindërve të tyre.
Ata kishin vendosur bashkërisht t’i zhvendosnin të moshuarit në qytet, pasi kishin edhe spitalin më afër dhe mund të paguanin edhe dikë për t’u kujdesur për ta.
Por kujdestarja nuk është ndodhur në momentin e ngjarjes së rëndë, pasi ka ndodhur në orët e para të mëngjesit.
Një akt i tillë duket se ishte paralajmëruar nga çifti. Sipas të afërmve, ata u kishin kërkuar fëmijëve t’i kthenin sërish në fshat, pasi nuk po arrinin të përshtateshin me jetën e re në pallat.
Por fëmijët duket se kanë menduar që ata do të përshtateshin me kalimin e kohës, pa e menduar këtë fund tragjik.
Mungesa e fëmijëve, të afërmve, por edhe sëmundja dyshohet se kanë ndikuar në gjendjen e rëndë psikologjike të çiftit, duke bërë që të kryejnë vetëvrasje/ Panorama
