Të tjera detaje janë zbardhur nga atentati i ndodhur ditën e djeshme në Fushë-Prezë, ku mbeti viktimë 71-vjeçari Abdulla Budlla.
Mësohet se një makinë tjetër që drejtohej nga dikush u afrua pranë “lapidarit” ku po qëndronte Budlla. Dikush zbriti nga vendi i pasagjerit të makinës së autorëve e qëlloi me kallashnikov. Më pas makina e autorëve është larguar.
Aktualisht, dyshohet se i moshuari nuk ka qenë shënjestra dhe se autorët mund të kenë ngatërruar person, pasi në vendin ku po qëndronte Budlla kishte dhe persona të tjerë. Mister mbetet fakti se asnjë nga gëzhojat me të cilat u ekzekutua viktima nuk është gjetur në vendngjarje.
Dyshohet se arma mund të ketë qenë me mulli, ose që gëzhojat të kenë rënë brenda makinës së atentatorëve. Ndër pistat kryesore për vrasjen e tij është dhe e shkuara e tre djemve të tij në Itali.
Ndërkohë, familjarë kanë deklaruar se nuk kanë pasur konflikte të mëparshme që mund të kenë çuar deri në ekzekutimin e 71-vjeçarit që punonte si taksist i palicencuar./ Opinion.al
